مسافات خفيةبقلم/ الشاعر نشأت البسيوني

مسافات خفية

بقلم/نشأت البسيوني 

في لحظة معينة تكتشف ان بينك وبين نفسك مسافات ما كنتش واخد بالك انها موجودة مسافات اتخلقت من تراكم المواقف ومن سرعة الايام ومن كل مرة قلت فيها انا كويس وانت في الحقيقة مش بخير ويمكن من كتر ما اتعودت تمشي وتتماسك اتخيلت ان المسافة دي مش حقيقية مع انها بتكبر كل يوم وتبدأ تلاحظ انك بقيت تتجنب بعض الاسئلة اللي بتظهر في بالك لانك عارف ان 

اجابتها هتوجع وانك بتسكت قدام مشاعر محتاجة تسمع صوتها وانك ساعات تضحك وانت من جواك محتاج لحظة هدوء مش اكتر

وتسأل نفسك ازاي وصلت للنقطة دي ازاي بقت في فجوة بينك وبين حقيقتك ازاي بقيت تحاول تكيف نفسك مع كل حاجة علشان ما تزعلش حد وتنسى تسأل هل انت راضي ولا لا ومع التفكير تفهم ان المسافات الخفية بتبدأ صغيرة جدا لحد ما تتحول جدار صامت 

بينك وبين نفسك وانك محتاج توقف للحظة وتراجع كل اللي هربت منه وكل اللي سكت عنه وكل علاقة استنزفتك وكل حلم ركنته على جنب وتبدأ تتقرب من نفسك من تاني تسمع احتياجاتك اللي نسيتها وتعترف بعيوبك من غير خوف وتدي لروحك مساحة تتنفس من غير ضغط وتفهم ان اقرب علاقة في حياتك هي علاقتك بنفسك ولو دي اتصلحت الباقي هيبدأ يتظبط لوحده

وتلاحظ ان المسافات بتبدأ تقصر لما تكون صادق لما تبطل مجاملة في مشاعرك ولما تتوقف عن حمل توقعات الناس على كتافك ولما تعترف انك محتاج وقتك ومحتاج ترتاح ومحتاج تكون انسان طبيعي مش نسخة مثالية تدرك ان اجمل حالة ممكن توصل لها هي لما المسافة بينك وبين نفسك تصير صفر لما تفهمها وتسمعها وتطمنها وتكون صديقها مش خصمها ساعاتها هتلاقي السلام اللي دورته في كل مكان وهو كان جواك من البداية