رُبَاعِيَّاتُ الأَحْزَانِ (( أَيَّامُ حَيَاتِنَا ))
( لِلْحُزْنِ فِي قَلْبِي مَكَان )
أَيَّامُ حَيَاتِنَا
شَرِيطٌ بِيِجْمَع كُلَّ ذِكْرَى مَرَّتْ عَلَيْنَا
لَحْظَةَ فَرَحْنَا، وَخَوْفَنَا وَدُمُوعَ عَيْنَيْنَا
كُلُّ اللَّي عَدَّى وَاللَّي فَاتْ وَمَرَّ بِيْنَا
تَنْهِيْدَة، صَرْخَة، وَالسُّكُوت، وَرَعْشَة إِيْدَيْنَا
وَقُلُوب كْتِير بِنْحِبُّهَا.. كَانَتْ مَعَانَا
وَعُيُون كْتِير بِنْحِبُّهَا.. خَانَتْ أَمَانَة
وَدَارِيْت فِي قَلْبِي جِرَاح، وَعِشْت فِي وَهْمٍ رَاحْ
أَيَّام بِتِبْنِي فِيْنَا، وَأَيَّام تِهِدّ فِيْنَا
وآدِي الحَيَاة.. يَوْم نِضْحَكْ وَيَوْم نِغَنِّي
وَيَوْم نِمُوتْ وِنْشِيْل جِرَاحْنَا فِي قُلُوبْنَا وِنْخَبِّي
وآدِي الحَيَاة.. يَوْم تِرْضِيْنَا وَيَوْم تِعَادِيْنَا
وَيَوْم تِسِيْبْنَا نِعِيش أَحْلَامْنَا، وَيَوْم تِصَحِّيْنَا
وَوُجُوه غَابَتْ.. بَسّ لِسَّه مَلَامِحْهَا فِيْنَا
وَصُوَر قَدِيْمَة.. كُلّ مَا نِلْمِسْهَا بْتِبْكِيْنَا
بِنِمْشِي فِي طَرِيْق، وِنْقُول خَلَاص نِسِيْنَا
وِنِرْجَع نِلَاقِي الشُّوق، فِي أَوَّل خُطْوَة مُسْتَنِّيْنَا
يَا لَيْل بِيِسْرَق مِنَّنَا أَحْلَى السِّنِيْن
وِيِزِيْد فِي قُلُوبْنَا الحَنِيْن لِلْمُسَافِرِيْن
سَاعَات بِنِضْحَكْ وَالوَجَع سَاكِن عَيْنَيْنَا
وَسَاعَات بِنِبْكِي مِن الفَرَح، لَوْ يَوْم رِضِيْنَا
مَرَّت فُصُول، وَالشَّيْب بَدَأ يِظْهَر فِي مَلَامِحْنَا
لَكِن لِسَّه جُوَّايَا طِفْل، بِيِعْشَق مَرَاجِيْحْنَا
آدِي الحَيَاة.. كِتَاب بِنِكْتِب فِيْه أَسَامِيْنَا
حَتَّى لَوْ ضَاع الحِبْر.. الذِّكْرَى بْتِكْفِيْنَا
وَالمَرَايا.. اللي بَقَت تِرْفُض تِدَارِي تَجَاعِيْد مَلَامِحْنَا
وَالأَمَانِي.. اللي انْكَسَر مِنْهَا الجَنَاح بَسّ مَا ذَبَحِتْنَا
وَقَفْنَا فِي وِشّ الرِّيح، رَغْم الجِرَاح مَا انْحَنَيْنَا
وَعَزَفْنَا مِنْ صُوت الوَجَع.. نَغْمَة تِخَلِّيْنَا
إِحْنَا اللي عِشْنَا فِي الضَّبَاب.. بِنِرْسِم بْإِيْدَيْنَا النُّور
وإِحْنَا اللي شِيْلْنَا فُوق كْتَافْنَا.. بُيُوت هَدَمْهَا الجُور
مُش بَسّ ذِكْرَى وَعَدَّتْ.. دِي قِصَّة جَبَل صَامِد
لَوْ مَالَت الأَيَّام عَلَيْه.. بِيِفْضَل هُوََّ اللي سَانِد
يَا عُمْرَنَا اللي اتْسَرَق.. كِفَايَانَا نِعِدّ فِي السِّنِيْن
إِحْنَا النَّهَارْدَة اللي انْخَلَق.. مِنْ صُلْب العَذَاب وَاللِّيْن
مَا عَدَّاش بِيْنَا العُمْر هَدَر.. وَلَا كُنَّا يَوْم زِيْنَة
إِحْنَا اللي سَهَّرْنَا القَدَر.. مَا بِيْن نَارَيْن الذِّكْرَى وَالذِّكْرَيَات
كَلِمَاتُ الصِّدْقِ
فَارِسُ اللَّيْلِ الحَزِيْنِ
مُحَمَّد عَطِيَّة مُحَمَّد
