************
في ناس بتموت كل يوم من الوجع
ومحدش يحس ويقول مالك يا جدع
وستّ الناس من القهرة قلبها اتخلع
شوية شماتة وتريقة وبطلوا بِدع
يتندروا على حكاويهم ويتسلّوا
غيبة ونميمة ولا كلّوا ولا ملّوا
ويزودوا على الوجع وجع ويهلّوا
يتفرجوا عليه زي ما راح زي ما رجع
سابوه للحزن والحيرة وحيد يتألم
لا راعوا صحبة ولا جيرة ولا سلّم
وإن حب يفضفض وكان عايز يتكلم
غمّض عينيه وسد ودانه وما سمع
كان محتاج شوية طبطبة وحنية
كان نفسه تقعده معاه لحظات شوية
وتفكره إنه مش وحده في الدنيا ديّه
وبدل ما يسندوه… سابوه لما وقع
لومي عليك إنك نسيت رب كريم
لو مدّيت إيدك للسما وقلت يا رحيم
عوض ربنا كبير وجبره عظيم
وشال همّك وفتح أبوابه من وسع
بقلم ايمان جمعة رمضان
جمهورية مصر العربية
Aucun commentaire:
Enregistrer un commentaire