زجلية بالعامية السورية
ياللي نعسانه عيونك
قلبي مشتاق
الحالة صعبة من دونك
وحق الخلاق
***
الدنيا سودا بغيابك
يابنت الناس
قلبي وعيني ع عتابك
قلبي الحساس
يقضو عمرن ع بوابك
متل الحراس
بلكي يصيرو أحبابك
ونضل رفاق
***
متل الشمس ب أيامي
نورتي الكون
وصرتي حكاية إلهامي
ليلية تكون
ولما بشوفك قدامي
بيغيب الكون
وحدك نجمة أحلامي
جوا الأحداق
***
مرة شفتك بالصدفة
بين الأزهار
قلبي صابيتو الرجفة
وشعل بالنار
لو كتفك حف بكتفي
مرة شي نهار
ومنك لو بست الشفة
باخد ترياق
***
حبك يا نور عنيي
غامرني غمر
بدعي وبرفع إيديي
يعطيكي عمر
وان جار الدهر عليي
وبعدني شبر
رح غنيلك ليليي/ة
نار الأشواق.
-----
محمد حبيب يونس سورية
Aucun commentaire:
Enregistrer un commentaire