أغنية
على فين
بقلم شريف شحاته مصر
حبك حيرنى سنين مش عارف أروح على فين
والقلب إحتار من صبرى أنا أجيب الصبر منين
مش عارف أروح على فين
قلبك غاوى يحيرنى من شوقك ليل ونهار
وأقول ربى يصبرنى زى ما بتفوتنى فى نار
تشغلني وتشغل بالى وتقولى الصبر جميل
ما تسأل يوم عن حالى أنا عايز بس دليل
إنك بتفكر فيا وأشوف شوق المغرمين
القلب إحتار من صبرى أنا أجيب الصبر منين
لو شفت الشوق فى عينيك أنا أصبر عليك تانى
مش بس أنا أفكر فيك وانت على طول تنسانى
يا بخيل فى مشاعرك ليا وأنا كل مشاعرى معاك
تبخل فى الحب عليا والقلب يدوب فى هواك
إن كنت صحيح تهوانى ما تفوتنى لوحدى حزين
دة القلب إحتار من صبرى أنا أجيب الصبر منين
فى كل مرة أقابلك أشتاق أسمع همساتك
أهمس بالحب وأقولك إمتى أكون كل حياتك
وعينيا تقول أهواك فى كل كلمة ونظرة
وتحير فكرى معاك وأحتار أنا كل مرة
مكتوب لى الصبر فى حبك وحنين المحرومين
دة القلب إحتار من صبرى أنا أجيب الصبر منين
بقلم شريف محمد شحاتة مصر
Aucun commentaire:
Enregistrer un commentaire