نصيحة أبويا- ٢
______________
تعبت يابا
من الدنيا ومتاعبها
أوعى يابني...
تفكر تلاعبها
انا اللي معرفتش أحسبها
كنت بخلص
من غير حسبان
أوعى فى يوم تآمنها
تتغر بجمالها ومحاسنها
كانت يا بني...
تكشر فى وشي
وتتضحك لمحاسبها
عشها بالطول والعرض
ماهي دنيا فانية وهانسبها
احكيلي يابا عن الزمان...
العيب فينا ولا فى الزمان؟؟
يابني الزمان هو الزمان
اللي اتغير طبع الإنسان
زمان كان الخير مكفينا
واللي فى ايدينا مش لينا
والحب مالي علينا المكان
كان بيبان الصدق
من عينينا
الطمع بقى مالي قلوبنا
بنبص دايما للي
مش فى ايدينا
والكدب على لسانا ينطق
بالزور وبالحلفان
نصيحة يابني من أبوك
أوعي تجري للي فاتوك
وقت الضيقة راحوا سابوك
خليك واقف سندال
واوعى تماشي
فى يوم أندال
ولا تقولشي كلام أمثال
اللي يقولك عمك
واللي يقول خال
خليك كيف عود الزرع
عمره ما مال
أوعى تاخد كلامي..
ضحكة وحكاية وسهراية
أنا يابني عشت الدنيا
بتعبي وشقاية
كنت لوحدي...
ولا حدش ساعد ويايا
الكل سابني وطاحبي
حتى شوف غدر الزمان
أوعى تآمن حد يقولك صاحبي
والتاني يقولك أخوك
أوعى تآمن للي سابوك
خدها مني.. نصيحة أبوك
نصيحة أبويا....
بقلمي /يحيى المنياوي
____________________
Aucun commentaire:
Enregistrer un commentaire