((إنتفاضة سندباد))
القدس بتنادي
بصوت ماهوش عادي
ردوا يا أحفادي
وكفايه م الأحزان
******
شايل همك في قلبي
والكبت مني إنفجر
إنفجاره كان بحده
جاي يهرول
راح يدوس إللي ف طريقه
يحرق الأعداء بنار
أصله تار
وإتروي عطشه بمرار
والمرار ساكن ف حلقي
له زمان
والزمان غير الزمان
دا إللي كان بينا وبينهم
لسه كائن
والأماكن هيه ٠٠هيه
وإللي مات وسط المعارك
ما له ديه
والقلق دايس عليا
بس واخد ف الزياده
والأمل أصبح كلام
والكلام بيقول سلام
والسلام عاملينه لعبه
مره أيوه
مره لا
وإحنا قتلانا الآلام!!
وإحنا قتلانا الآلام!!
******
القدس بتنادي
بصوت عصفور جريح
عاني مهب الريح
نقر لي ف ضلوعي
إنتفض قلبي الجريح
ما أصلي أنا الفارس
ولأرضنا حارس
دا أنا السندباد
حالف لاضمد جروحك
روحي فدي روحك
وأغسل عنيكي بشمس طاله
من عيون الطهر
وافرد ايديكي بلمس عاشق
من زمان المهر
دا قدسنا دايما أبيه
وإبتسامة الفرح جايه
يوم رجوعنا
هيه ٠٠٠٠٠٠هيه
******
الشاعر محمد علي فرغلي احمد
Aucun commentaire:
Enregistrer un commentaire