((ماترد يا جدي2؟))
آه يا جدي
آه يا جدي
غيروا ملامحك
الورد إتسمي بإسمك
لجل ما يغيروا رسمك
ماله عيش الكانون
واللنضه الجاز
والملح بكمون
إحنا ناس بساط
نعشق غناوي الإنبساط
بلاها عيشة الترف
دا الكرامه شرف
الطبع غلب التطبيع
قطع فينا وبيع
مش مهم تبيع بكام
بيع يا جدي والسلام
الله يرحم زمان
كنت حارس ديدبان
تقول الكلمه ماتخافشي
غير الحقيقه ماتعرفشي
من فين جاك الخرس
والمشي وسط الحرس
أحاول أنطقها
والدمعه على خدي
مش قادر أقولها
أنت مش جدي
******
الجد كان قاعد
وفجأه قام
قال يا ولدي
أغلي م الولد
ولد الولد يا ولدي
دا الهم كل جلدي
عايشين بلا داعي
زوتوا أوجاعي
زمن كلاب وأفاعي
يا ولدي كان ودي
يبقي الأمل فيكم
ماتردوا وتقولوا
إيه اللي صار بيكم
وهجرتوا ليه الريف
م الخصم أخدتوا الرغيف
والأرض صبحت بور
م الضعف بقت قبور
آه يا زمان
دا الأب ع الإبن هان
والدم ماعاد يفور
والأخ يشهد زور
إشتريتوا الهم
ف إنتظار المم
جث الضحايا
كم ؟
منتوره هنا وهناك
وعنينا ف الشباك
معصوبه بالأحزان
وقلوبنا مأسوره
واللي آسرها شيطان
عالغدر صار واخد
وياخدنا بالواحد
مين اللي جايله الدور ؟
ماترد يا جدي ؟
هيه العنين عميت
علشان تشوف عتمه
لحظة طلوع
النور !!
ما ترد يا جدي ؟
ماترد يا جدي ؟
******
الشاعر محمد علي فرغلى احمد
Aucun commentaire:
Enregistrer un commentaire