ما بيني وبيني *** بقلم الشاعر/نشأت البسيوني

ما بيني وبيني

بقلم/نشأت البسيوني 

في مساحة غريبة بيعيش فيها الانسان مساحة محدش يقدر يدخلها غيره مهما قرب منه ناس ومهما ادعى حد انه فاهمه تفضل هي المساحة اللي بتجمع سر صوته الداخلي واحلامه اللي ما قالهاش وذكرياته اللي عمره ما قدر يمسحها المساحة اللي فيها كل شيء حقيقي واللي فيها كمان كل شيء موجع وملهم في نفس الوقت ما بيني وبيني عالم كامل مليان اسئلة ما لهاش ردود وافكار 

بتعدي من غير ما تعرف هي ليه ظهرت دلوقتي بالذات وهناك في الزاوية اللي محدش يشوفها غيري بيقعد الخوف جنبي بس بيقعد الامل برضه وانا اللي بقرر اسمع مين فيهم وامشي مع انهي طريق

وفي اللحظات اللي بتتعطل فيها الحياة وتبان الدنيا واقفة بلا تفسير الا مساحة ما بيني وبيني اللي تفهمني من غير ما اتكلم تواسيني من غير ما اطلب وتنورلي الطريق اللي انا نفسي مش 

شايفه وبالرغم من كل الازدحام اللي جوايا الا ان دايما في شعور غريب بالطمأنينة لما ارجع لنفسي واعرف اني لسه قادر اقوم

ومهما كان شكل الطريق اللي قدامي معتم متقطع صعب مليان احتمالات ما حدش يتوقعها تفضل المساحة دي هي المكان الوحيد اللي اقدر اختار فيه بداية جديدة بداية مفيهاش خوف من الماضي ولا قلق من اللي جاي بداية بتطلع من اعماقي من النقطة اللي 

بيفهمني فيها قلبي اكتر ما بيفهمني عقلي ما بيني وبيني مش صراع ولا هروب لكنها رحلة اكتشاف رحلة كل ما افتح باب منها الاقي باب تاني مستنيني رحلة بتقول ان الانسان مش محتاج ضوء من حد قد ما محتاج يلاقي ضوءه اللي اندفن تحت تراكم السنين

 اقدر اقول ان اللي بيني وبيني هو الحقيقة اللي هافضل راجع لها مهما اتوه هو الوطن اللي ما بيتغيرش حتى لو اتغيرت انا هو النسخة اللي ما بتخدعش واللي مهما اتألمت عمرها ما خانتني