مدينة لا تغفو ***بقلم الشاعر /نشأت البسيوني

مدينة لا تغفو

بقلم/نشأت البسيوني 

في مكان ما جوا كل إنسان في مدينة صغيرة ما بتنامش مدينة شكلها مش شوارع ولا بيوت شكلها أفكار ما بتقفش لحظة أحلام بتجري بسرعة الزحمة أسئلة مابتتهداش وذكريات ماشية من غير ما تستأذن مدينة جوا الروح عمرها ما تعرف الليل لأنها دايما منورة بصراع الإنسان مع نفسه وبحكاياته اللي لسه ما خلصتش المدينة اللي لا تغفو فيها أماكن مهجورة بتقول إن في جروح قديمة لسه 

بتتنفس وفيها نوافذ مفتوحة بتدل على فرص جديدة مستنيا خطوة وفيها أصوات بتعدي وتروح لكن أثرها يفضل وفيها ضحكة اتخزنت في زاوية هادية علشان تفكرك إن الحياة مهما كانت تقيلة ما زالت فيها مساحة فرح تستحق وفي المدينة دي الإنسان يشوف نفسه من غير مرايا يشوف خوفه وهو بيحاول يستخبى يشوف قوته وهي بتظهر فجأة في وقت مش متوقع يشوف الخطوات اللي 

خادها من غير ما كان فاهم إنها بداية جديدة يشوف أبواب اتقفلت لأنها مش له وأبواب اتفتحت لأنها كانت مستنيا اللحظة الصح

المدينة اللي لا تغفو عمرها ما تكذب على صاحبها لأنها بتعرض عليه الحقيقة زي ما هي الحقيقة اللي حاول يهرب منها سنين الحقيقة اللي خاف يواجهها الحقيقة اللي عمرها ما كانت نهاية بالعكس كانت بداية لتغيير كان لازم يحصل ومع الوقت يكتشف الإنسان إن 

المدينة دي مش عبء ولا فوضى زي ما افتكر زمان هي الدليل إن جواه حياة مش بتستسلم وإن روحه مهما تعبت لسه بتدور على طريق صح وإن قلبه مهما اتقفل عليه لسه بيدق لشئ محتفظ بيه جوا وفي الأخير الإنسان يفهم إن المدينة اللي ما بتغفوش هي أكتر حاجة حقيقية فيه لأنها بتفكره إنه عايش وإنه بيحارب وإنه بيتغير وإنه لسه قادر يكمل مهما كسرته الأيام ومهما عطلته المواجع ومهما اختفى السند