بقلمي :
..........
من ألم الأسنان زهقان
والعقل متفرهد تعبان
لامسكن مفعوله يهدي
ويسعفني من الصللان
من شدة ألمي طهقان
بأهاتي مشيت حيران
فلقيت يافطه مكتوبه
لعيادة طبيبة الأسنان
قولت لقلبي الخيبان
خليك حجري الصوان
شجعني ودخلني قوام
على حالي كان شفقان
عيوني سارحه بتوهان
حسيت براحه وروقان
على كرسي قاعد قدام
ولدوري ملهوف قلقان
ندهوني ودخلت قوام
لطبيبه بترحيبها أمان
سمعتها سابقها قدام
تستوعب خوف العيان
بهدؤها شاطره بإتقان
بتعالج خراج فطسان
في الخلع تطهير لللثه
والحشو وزرع الأسنان
سماعه للنبض بتوصف
اسباب تصديع الراس
تعقيم الأدوات متوصف
والبنج لعدم الإحساس
وجونتي أبيض بظرافه
بأيادي تلمس بإحساس
وكمامه مربوطه بلطافه
تحجب عدوى الأنفاس
وألام في الفم بتشكي
عايزه مضمضه بالكاس
وخدود ورمانه بتغلي
محتاجه مرهم مساس
وضروس بالجير عميانه
وأنياب تدغي بوسواس
طبيبه إنسانه شقيانه
بتساهم في علاج الناس
...........................
أحمد الشريف حسين
Aucun commentaire:
Enregistrer un commentaire