خوف المصاير
ياها المصاير ديمه
فينا ماشى قولا
إلا إنت إخترت الرحيل
وكل روح بتهوى زولا
وما بقى لى اجبرك
لما الهموم استعصت حلولا
وخفت من ملامك
والكلمه القاسيه ما قادر أقولا
دسيت جواي الألم
خشيت جور الدنيا وشماتة عزولا
ومهما نتهرب من مصايرنا
وتصبح نفوسنا من نتايجنا خجولا
حتبين الحقيقه المره
ونعيش قسوة الايام وطولا
ما خلاص الخطوه تاهت
فى وسط الظلمه وإحتار دليلا
وزهرات الأمانى اليانعه
عطشت وحانت لحظات ذبولا
أصلك جاهل ألم الفراق
وحرقة دمعتو ساعة نزولا
دمعه بتطلع من الفؤاد
بس فى العيون مجراها وسبيلا
دمعه بتكسر الكبرياء فينا
طاعنه فى هزال اجسادنا ونحولا
يا قلب ياما خاب رجاك
والفرقه خلاص أكتملت فصولا
تانى ما بضحلك ليك زمان
والأمانى النبيله ما أظنك تطولا
والبسمه البريءه فقدت بريقا
والضحكه أمست باهته ومعلولا
والريده سلكت سكة ضياع
وخطاوينا تانى ما بتلم شمولا
بقلمى أنا ابراهيم عبد الرحمن أحمد شبكه
Aucun commentaire:
Enregistrer un commentaire