" القلة التي ترضي لنفسها الذل !!!
ــــــــــــــ د.صالح العطوان الحيالي .العراق
هناك اسالة تراودني بين الحين والآخر أردت أن اسأل بها وهذه الأسئلة تخص قلة قليلة من العراقيين الذين يغادرون بلدهم للخارج سواء للاستقرار أو للسياحة كلي ثقة أن الأكثرية تتفهم ما وددت السؤال عنه ..
هناك بعض العراقيين من يطلع خارج البلد يقبل يشتغل حمال ومن يجي بالعراق ميقبل الا وزير !
ولماذا بعض العراقيين في الخارج معارض لنظام الحكومة وبالعراق هو قيادي بالاحزاب !!
ولماذا بعض العراقيين من يسوق سيارة بالخارج ما يمد ايده على الهورن ومن يجي بالعراق ما يرفع ايده من الهورن !
ولماذا بعض العراقيين بالخارج يقبل يتزوج وحدة معاشرة كبله الف واحد ويكول عنها اشرف وحده ومايقبل يتزوج عراقية باوعت على ولد من عمرها سنتين !
ولماذا بعض العراقيين بالخارج يشرب عرك ومن يجي للعراق يلبس عمامة !
ولماذا بعض العراقين بالخارج يوكف بالسره لدائرة الهجرة عشر ساعات وبالعراق ميقبل يوكف بالسرة !
ولماذا بعض العراقيين بالعراق عنتر ويشيل اربع مسدسات وبالخارج اكبر جبان ميكدر يعبر الشارع الا صديقه يلزم ايده ويحضنه!
ولماذا بعض العراقيين باوروبا يربي (جلب اجلكم الله و قطة "بزونه" )وبالعراق بس يشوف ( جلب اجلكم الله ) بالحجار وراءه
ولماءا بعض العراقيين بالعراق بعد خروجه من الجامع يكسر كلوب الشارع وباوروبا يمسح الشارع بايديه
ولماذا بعض العراقيين باوروبا يحجي على كيفه يادوب تسمع حسه وبالعراق بس يعيط
ولماذا بعض العراقيين بالعراق يشمر كشور وقواطي بالشارع وباوروبا حتى كطف السيكارة يضعه بجيبه
ولماذا بعض العراقيين بالعراق يصلي سبع اوقات وباوروبا يصلي بالسنة مرة
ولماذا بعض العراقيين باوروبا يلبس تراجي وبالعراق يسوي نفسه فحل التوث
ولماذا بعض العراقيين باوروبا يكيف من بنته تجيب البوي فريند للبيت وبالعراق ميخلي بنته تصعد بالسطح
ولماذا بعض العراقيات باوربا تشرب سيكارة بالشارع وبالعراق تشرب سيكارة بالتواليت
ولماذا بعض العراقيات تقبل تتزوج اي واحد باوروبا وبالعراق متقبل الا دكتور
ولماذا بعض العراقيات باوروبا تشرب الواين وتكول هذا عصير عنب وبالعراق تستحرم تاكل عنب
ولماذا بالعراق بعض العراقيات شعرها كل شيب وباوروبا تصبغ شعرها احمر
ولماذا اني اخاف اكتب بالعراق ومن اطلع بره لساني يصير طويل
ولماذا ولماذا ماادري ليش منصير مثل الآخرين
بس العراقي الحقيقي يظل أبو العزة وكرامة وشيمة وما ينذل وبطل يدافع عن ارضه وعرضه ويظل موطنه الحقيقي أرض دجلة والفرات
Aucun commentaire:
Enregistrer un commentaire