ياريتني ما خرجت من الجيش
******************
أنا كنت عسكري وخدت شريطين
وبقيت أنزوح ولا أجدع شاويش
وفي سنة ألف وتسعمايه وتمانين
سلمت المخله وودعت الجيش
وسلمت البياده واربع بطاطين
ياريتني ماخرجت من الجيش
مصنع الرجاله الصامدين
إللي متخافش ولا تنحنيش
******************
كنت ابعت لأمي الرساله
وأقولها ياما متعيطيش
ابنك راجل وزينة الرجاله
ولما أروح ومجيش
إفرحي وقولي ابني في الجنه
وعليه مينبكيش
وديه ياما ضريبة الجيش
مصنع الرجاله الصامدين
اللي متخافش ولا تنحنيش
******************
كانت أيام جميلة
بيقولوا عليها مبتعديش
كدب والله وحياة ستي أمينة
ذكريات وماتتنسيش
واللي ينساها ميطمرش فيه
خير البلد ديه والملح والعيش
يا محلى أيام الجيش
مصنع الرجاله الصامدين
اللي ماتخافش ولا تنحنيش
******************
فين أيامك ياعسكري اسماعيل
بتاع المطبخ كان شكله بيضحكني
وبالرغم من أسمه الجميل
كان نفسه في الأكل يدوخني
ولا أذان اللحمة
والرز والخضار ملهوش مثيل
ولا المسقعه يعني الطبخه السوده
تخليك زي الديدبان تلف طول الليل
يا حلاوة أكل الجيش
مصنع الرجاله الصامدين
اللي ماتخافش ولا تنحنيش
**************
فاكره ياما الواد إسلام
ابن جارتنا أم فرحات
كان بيصلي بينا ويقف إمام
وحياة الغالي ابويا علي إيدي مات
ووشه كان زي فلقة القمر
وفي نعشه طاير زي الحمام
قبل مايموت بساعتين
سألته مالك سارح في إيه يا إسلام
قالي مصر خايف عليها من الغدارين
ودخلت الخيمة وجبت الأعلام
واطينا عليها وبوسنها
وكانت أغلي بوستين
الله يرحمك يا إسلام يابطل الجيش
مصنع الرجاله الصامدين
اللي متخافش ولا تنحنيش
******************
عارف ياصاحبي
وحياتك عندي
اكتافي الاتنين
كبرت في الجيش
وبقيت ولا المصارعين
زي الهجمة عافي
أضرب أربعه وتلاته واتنين
ياريتني ماخرجت من الجيش
مصنع الرجاله الصامدين
إللي ماتخافش ولا تنحنيش
*******************
فين أيامك يا حاصول كامل
لما كنت تتكلم
صوتك يجلجل
ولما كنت تمشي
الأرض تزلزل
وعلمتني إزاي أبقى راجل
وإزاي أكون من الصابرين
يارتني ماخرجت من الجيش
مصنع الرجاله الصامدين
اللي ماتخافش ولا تنحنيش
*******************
كلمات بسيوني صديق
Aucun commentaire:
Enregistrer un commentaire