خدلك منظر .. ( عامية )
..
اكتب وجع الموجوعين
خلى ف ايدك كاميرا تصور
تعب الناس الشقيانين
واللي بيشرب حزنه وعرقه
ومش لاقيين
واللي بيستر همه عشان
ما يبانش الضعف عليه
واللي يداري الخوف بعنيه
واللي حزين والناس فرحانه
ومش شايفاه
واللي بيكتم وجعه
وهو بيصرخ من جواه
واللي جميع الناس بيعاه
واللي الصبح بيخرج دايما
قبل ما يفطر
خدلك منظر
سجل عندك كله ف دفتر
أهل بلادي وزي بلادي
ما فيش صابرين
صابره وشاربه المر سنين
لكن تلقى الوجه بيضحك
فيه البسمه ليوم الدين
ما بيتغير ما بيتعكر
خدلك منظر
واللي بياكل عرق الناس
والناس شيفينه
اللي ما عنده حياء من ربه
و شرعه و دينه
واللي بيرشي بكل فلوسه
عشان يسرقنا
ياكل حقي وياكل حقك
يظلم ولدي ويظلم ولدك
بره وجوه
ولا يعرفش العيب فين هوه
ولا بيفكر ولا بيقدر
خدلك منظر
....
فايز صادق
Aucun commentaire:
Enregistrer un commentaire