( فى يوم ميلادي )
بقلم / يحيى المنياوي
نفس المكان..
نفس الزمان
نفس السنين لما تدوس
فوق الجراح
يصرخ أنيني ويقول
كفاية اللي راح
نفس الدموع فى العينين
يا دمعة العين الحزينة
كفاية بقى أحزان
نفس الظروف
قدام مراية الزمان
بعيني بشوف شخص تاني
مش أنا
والضحكة المستخبية
كانت هى فرحتي.. هى الهنا
انا الي زرعت فى بستاني محبة
وانا اللي قلبي من الدنيا جنى
هانت العشرة والحب هان
نفس المكان
نفس الزمان
أنا كل اللي ناقصني
اني أفرح... اني أحس بالأمان
مش بعتب عليك يا زمن
ولا بعتب على السنين
أنا بس بعتب
على العمر اللي عدى
فى خبر كان
يا دنيا ليه اتبدل الحنان
بالقسوة والأنين
يا زماني بس قولي
لأمتى أعيش كده
ولأمتى أعيش حزين
ليه دايما تملي
تبات الدمعة على الخدين
نفس المكان..
نفس الزمان
أنا كل اللي ناقصني
اني أفرح... اني أحس بالأمان
قلبي اللي صان
ولا عمره خان
عشرة السنين
قلبي اللي كان
دايما بيوفي
بالحب والحنان
راح فين الأمان
قولي يا زمان
راح فين الحنين
الشعر شاب.. قبل الأوان
ده أنت ياعمري
مالحقتش تفرح
مالحقتش تعيشلك يومين
راح الشباب..من غير عتاب
ولما عاتبت الزمان
قالي أنت مين
أحلامي سراب
خدتني لبعيد.. لأبعد مكان
صدقت فرحتي
والضحكة اللي فى العينين
نفس المكان
نفس الزمان
أنا كل اللي ناقصني
اني أفرح.. اني أحس بالأمان
__________
Aucun commentaire:
Enregistrer un commentaire