ومحتلاني من جوة
حصون القلب في ايديكي
وانا لا حول ولا قوة
ورمش عنيك رصاص نادر
لكل دروعي كان عابر
بكل سهولة كان قادر
يوقع قلبي من طوله
فتح لك بابه ع آخره
عطاك الاذن بدخوله
وقبلك كان كما قلعة
ومتحاوط بسور عالي
من الأفكار
وأولها بأن الدنيا منصوبة
كما في السيرك
وفيها العشق لعب بنار
بتحرق كل من جرب
وتوجع كل من قرب
وتانيها بأن الحب مش دايما
صاحب لقرار أو كلمة
ومش دايما يلم الشمل
بييجي نصيب مع قسمة
يدوسوا النبض جوانا
باقدامهم كدوس النمل
وعلى غفلة من الايام
يقولوا كفاية كده احلام
ويبقا الحب طفل لقيط
ملوش الحق يوم ف حياة
على جنب الطريق مرمي
ورافضة أمنا الدنيا
يعيش معها وتتبناه
وتالتها برغم حلاوة النظرة
مع الهمسة
ورغم الفرحة بلقانا وبالاحضان
لكن البعد غول غربة
بيمحي الفرحة بالاوطان
تظل الذكري سوط جلاد
بتكوينا بصمت حزين
بكلمة صداها ف ودانا
وكم لقطة دموع ف العين
لكن السهم من رمشك
ترك قوسه وصاب مرماه
وقلبي خلاص عمل ثورة
وشال روحه علي كفه
ورافض حتي لمشاورة
بكل ما أوتي من قوة
نصر حبك وقال له أه
بقلمي 🖊️
شعبان محمد بدر
Aucun commentaire:
Enregistrer un commentaire