وحدى
بقلم شريف شحاته مصر
نفسى فى مركب فيها شراع أهرب فيها لأى جزيرة
فيها أعيش وبدون أوجاع بس بشرط جزيرة كبيرة
ما أشعر فيها بأى صداع عقلى كمان يرتاح من الحيرة
تخلا حياتى من الأوضاع اللى تصيب أحقاد أو غيرة
أسمع أحلى صوت عصافير طايرة تغرد بجانب دارى
مش طير سئ مش بيطير داير بس يقول أخبارى
ما أشوف فيها عقول بحمير وأكتم جوة فى قلبى وأدارى
غزلان ترقص وسرب كبير طاير فرحان من أشعارى
أزهار زاهية بين أشجار أسرح وأجمع جوز الهند
تفاح مانجو وأحلى ثمار أجمع وآكل منها وأعد
مش عربجى داير بحمار ماشى يصرخ فينا بالعند
ولا أسمع شتم كأنه هزار بين فحلين وضرب يهد
بعد العصر أسبح فى البحر بين أسماك أو بين دلافين
جو خيالى قوى شبه السحر أشكال حلوة تسر العين
مش أشكال تجلب لك فقر ونفوس وحشة شبه الطين
لو أعيش فيها سنة أو شهر لوحدى ما أعاشر بنى آدمين
بقلم شريف محمد شحاتة
مصر
Aucun commentaire:
Enregistrer un commentaire